الخلطة دي مفيدة للبنات اللي عندهم تساقط و قشرة و حكّة و فروة راسهم مكتومة دايماً و مُدهنة مهما استخدمو شامبوهات وعلاجات..
طبعا اساس الشعر الصحي فروة صحية، اذا اعتبرنا الشعر زي الزرع لو ما كانت التُربة مُهيأة بشكل كويس ما ح ينبُت 👌🏻
الخلطة دي ح تعمل ليك زي ديتوكس او تنقية للفروة بِفضل الاحماض و الخصائص المضادة للفطريات في الثنائي العجيب ده( زيت جوز الهند و الليمون )، غير التغذية الوَقتيّة للشعر، و مع الاستمرار عليها مرتين كل اسبوع حتلاحظي الشعر متغذي لدرجة ان لونه حيكون متغير حيكون اوضح و اقوى (خاصة اللي شعرهم متضرر من الصبغات)..
يُقال انها بتقلل الشيب مع الاستمرار و بتمنع ظهوره اذا ما كان عندك من الاساس..
📍الطريقة :
✔️ملعقتين زيت جوز هند
✔️ملعقة عصير ليمون
تخلطيهم مع بعض و توزعيهم على فروة نضيييفة(تكوني غاسلة الشعر كويس قبلها) و تدلكي الفروة بالخليط كويس جداً لما تحسيها اتشبّعت بيه، خليها ساعة و غسلي الشعر،. كرريها مرتين ف الاسبوع💜
💡طيب سؤال مهم ليه فئة كبيرة مننا بتكون معرضة للقشرة والدهون الزايدة ف الفروة؟!
لأنه ثقافتنا في موضوع تغذية الشعر ك عرب و سودانيين خاصة جاية من موروثات خاطئة كلها، عشان يكون شعرنا صحي و يطول ما مفروض نعمل دهن و زيوت ف الفروة و نقعد بيه ايام بدون م نغسل الشعر و يفضل كاتم على بصيلات الشعر و حابس الأكسجين عن الفروة، و يجي عليه العَرق والرطوبة والشمس كمان! ده كله كفيل ب تدمير الشعر،
و يجو يقولو ليك المَقولة الشهيرة (حبوباتنا زماان شعرهم كانو بيقعدو فيه) 🤔
طيب منو القال انو م كان عندهم قشرة، الطول براهو ما مقياس لصحة الشعر، ممكن يكون شعرهم قاوَم الظروف دي كلها و طال لكن يكون هش و متقصّف و ملزّق في بعضه و تكون في قشرة و حكة و يمكن كان يطول اكتر من كده لو لقى عوامل ساعدتو!
الأصل في العناية بالشعر انو تكون الفروة دايماً نضيفة، حتى كريمات الشعر اليومية ما مفروض نطبقها ع الفروة، الشعر بيتغذى عبر مساماته زي م عرفنا في موضوع مسامية الشعر،. اما بالنسبة لتغذية الفروة فأفضل طريقة تغذيها بيها هي (حمامات الزيت) اللي هي بتكون ساعتين او اكتر و تتغسل، كده الفروة بتكون اخدت كفايتها و ح تفضل رطبة و متغذية طول الاسبوع..
ياريت نتخلى عن المعتقدات القديمة و ناخد منها الصح والمفيد بس و نشوف العالم فيهو شنو والدنيا ماشة كيف❤️
ليست هناك تعليقات:
إرسال تعليق