 |
اليوم حنتكلم عن طريقة التقشير الصحيحة بالسنفرات او الاسكربات (التقشير الفيزيائي العادي)
لأنه للأسف لحدي تاريخ اللحظة في بنات ما عندهم فكرة اصلا عنه.. و في بنات بعملوه غلط و يخربو بيه بشرتهم عشان كده بستغنو عنه نهائياً و يقولو ما نفع معانا او ما جاب نتيجة.. في حين ان هو الحل الأول عشان نوصل للبشرة الحلوة البتلمع اللي بنحلم بيها كلنا!!
بشرة نضيفة يعني شنو؟؟ ما انا بغسل وشي كل يوم!!
الغسيل لوحده ما كافي ابداً، لازم تنضيف عميق يشيل كل الرواسب و ده بيتم عن طريق التقشير او الاسكرب(سنفرة)..
كيف تحضّري سنفرة طبيعية ممتازة ؟
من افضل المكونات اللي بتعمل سنفرة و نضافة حلوة جداً جداً هو السـكــر، في ناس بشرتها حساسة شديد في الحالة دي لازم يكون السكر مطحون، في بدائل كتيرة للسكر والخيارات واسعة بس عموماً اي حاجة Grainy او فيها حُبيبات تعتبر سنفرة، زي الترمس المطحون، الرز المطحون، البُن، لبن البودرة... الخ، تتخيلو الاجانب اللي بشرتهم واااو ديل بيستخدمو الرمل بقشرو بيه وشهم و جسمهم😃
طبعاً حاجة ثابتة انو عشان تحضري المقشر لازم تخلطي حاجة ذات قوام كريمي او سائل مع المادة اللي فيها حبيبات دي مثلا تخلطي معاها زبادي او زيت (الزبادي ممتاز للناس اللي عندها حبوب لأنه فيه زنك و الزنك بيعالج الالتهاب)..
الفائدة المرجوّة من التقشير :
غير انه بشيل الجلد الميت و الرواسب كمان بحفّز انتاج الكـولاجيـن لأنه نفسسس فهم الديرما رولر بالضبط، نفس الوظيفة، الحُبيبات دي بتخدش نسيج البشرة خدش بسيط ما بتلاحظيه بالعين المجردة، فالجسم يبدأ يعمل رد فعل شِفائي و ينتج خلايا جديدة و يفرز الكولاجين بكميات اكبر ❤️
طيب انا جهّزت السنفرة او المقشر استخدمها كيف عشان اقشر وشي بالطريقة السليمة؟!
في بنات بيكرهو التقشير لأنه زي ما قلت اخدو عنه فكرة سلبية نتيجة الاستخدام الخاطيء اللي خلى النتيجة مؤذية و في افضل الاحوال ما بشوفو نتيجة اصلا..
- اول خطوة : لازم تكون البشرة مبلّلة بموية فاترة عشان المسام تتفتح، ما ينفع تعملي سكرب او تقشير على بشرة جافة نهااائياً
- تاني خطوة : تاخدي كمية مناسبة و تبدي تقشري بحركات دائرية زي تلات دقايق .. طيب ليه لازم حركات دائرية؟! لأنك لما تفركي وشك بالمقشر بحركات مستقيمة حتسبب خطوط عميقة ما بتشوفيها حالياً بس بتظهر في شكل تجاعيد بعدين.. حاولي ما تضغطي بيدك شديد و ما ترخيها شديد المهم تكون حركات متوسطة القوة👌🏻كمان ما تقربي من المنطقة تحت العين ابداً لأنها حساسة والجلد فيها رقيق جداً. بعد الفرك حتخلي المقشر كده على وشك 10 دقايق كأنه ماسك عشان البشرة تستفيد بس من المكونات بعدين تغسلي بالموية تكون باردة شوية عشان تضيق المسام.. حاولي و انتي بتغسلي بالموية تغسلي من تحت لفوق (لو لاحظتو في الاعلانات بنشوف البنات بيشطفو وشهم بالموية من تحت لفوق ما بعملو زينا كده 🤣لأنو دي الطريقة الصحيحة و الحركة دي بتمنع ترهل الجلد بمرور الزمن).. ممكن ترشي وشك بموية ورد او اي تونر و موية الورد تونر طبيعي و رهيب بتشد المسام و تخلي البشرة ناعمة و نضيفة
- الخطوة الاخيرة : الترطيب، لأنه احسن شي ممكن تقدميه لبشرتك هو تقشير و بعده على طول ترطيب و حتشوفي العجب❤️ لأنه بعد التقشير البشرة بتكون في اتم جاهزيتها لاستقبال المستحضرات والاستفادة منها لأقصى درجة.
كم مرة لازم اقشر بشرتي؟
مرتين او تلات مرات في الاسبوع كحد اقصى، من اول مرة شوفي وشك بكون ناعم و حلو كيف ، ابداً ما تكسلي منو و ما تفكري تخلي بشرتك بدون تقشير لأنه بشيل ليك كل الجلد الميت و الأوساخ المتراكمة في المسامات اللي انتي اصلا ما بتكوني شايفاها بتخلي بشرتك ما تقدر تتنفس و حتى الزيوت الطبيعية اللي هي بتفرزها لما ما تلاقي طريقة تعبر بيها للخارج حتتراكم تحت جلدك في شكل حبوب دهنية.. الجلد الميت لما يتراكم بيعمل طبقة بتخلي بشرتك ما تمتص اي حاجة تختيها عليها ولا تستفيد منها(كأنك بتمسحي في حيطة و هي فعلا حيطة..حتى الحيط بسنفروها اول عشان البوهية تطلع ناعمة😉) ..
اضرار الإفراط في التقشير :
طبعاً معروف كل شي يزيد عن حَدُّه يقلب ضِدّه، اذا قشرتي بشرتك يومياً حتكوني بتزيلي الطبقة العُليا من الجلد قبل تتعافى فحيحصل ليك الآتي :
بشرتك بتكون مُجرّدة من الزيوت الطبيعية وفاقدة للنضارة، كمان بتعرّضيها للالتهابات والحبوب، غير ان عملية الفرك يوميا ممكن تأدي لظهور تجاعيد مبكرة ، كمان بتسبب كدمات بتكون في الاول لونها وردي بس بتغمق و تكوني شوهتي نفسك بنفسك..
عشان كده طريقة الاستخدام الصحيحة هي اللي بتشكل الفارق..
*ملاحظة : كل فترة حاولي تجربي انواع مختلفة من السنفرات و تضيفي عناصر مغذية تستفيد منها بشرتك ما تفضلي على نوع واحد..
ليست هناك تعليقات:
إرسال تعليق