طبعاً كلكم شفتو الضجة اللي عملها جهاز "لونا" و الاجهزة المشابهة ليه زي "فوريفر" و غيرهم..
الليلة جايبة ليكم حاجة نتائجها ما بتقل ابداً عن الأجهزة دي و سعرها رخيص، جبتها من السعودية قبل سنتين ب 10 ريال بس و لحدي اليوم مُحافظة على مرونتها و جودتها 👍🏻
حتفرق معاكم جداً و الغسول معاها حيديك نتيجة 100%،
بتنظّف البشرة والمسامات خاصة ناس البشرة الدُهنية واللي عندهم رؤوس سوداء..
استعمالها ساهل و عمليّة جداً، بتمسكيها بأصابعك الاتنين و تنقطي عليها كم نُقطة من الغسول وتفركي وشك بضمير اصلا هي ناعمة جداً فالفرك ما حيضرك (حتى البنات اللي بيستخدمو صابون ممكن ترغّي الصابون في وشك وبعدين تفركي بيها)، نُتوءات السيليكون الصغيرة دي بتخلي الغسول يتغَلغل و تشيل اي شوائب او بقايا مكياج او دهون و بتخلي الوش ناعم و لامع يلق لق 😍
عندها استخدامات تانية كمان:
ممكن تستخدميها ك اداة لتعزيز الامتصاص لما تعملي سيروم على وشك، بتخليه يتغلغل لداخل بشرتك و بتضمن امتصاص اعلى، و مش السيرم و بس كمان ممكن تطبقي بيها اي كريم او مستحضر عناية..استخدميها مع الغسول لإزالة المكياج لأنها بتزيله بفعالية، لكن ما تستخدميها مع المُقشّر، او الغسول المقشر، لأن الحُبيبات ممكن تعلق بين شُعيراتها و كده المقشر حيفقد فعاليته لأن اعتماد التقشير كله على الحبيبات..ممكن تستخدميها ك اداة مساج لتنشيط الدورة الدموية و عمل refreshing بس استخدمي معاها كريم مرطب لتسهيل حركتها على سطح البشرة و في نفس الوقت بشرتك تكون استفادت من الكريم..
ليست هناك تعليقات:
إرسال تعليق