قررت انزل تدوينة عنه بغرض الفائدة و ليس الإعلان، منتج جربته زي اي منتج و حابة انقل ليكم تجربتي بكل مصداقية لأني بحب افيدكم بكل شي جربتو و لقيت منه نتيجة عجبتني..
ما اظن في واحدة ما عارفة يعني شنو سيروم، لكن عموماً هو مُستحضر فرقُه من باقي المستحضرات انه تركيز المواد الفعالة فيه أكبر بكتر .. هو مستحضر عِلاجي اكتر من انه تَجميلي و بيعالج المشاكل من جوّة من طبقات البشرة العميقة، لكن اكيد نتيجة المُعالجة دي حتشوفيها في شكل بشرة جميلة وخالية من العُيوب، كمان بيغذّي و بخلي البشرة رَويانة و لامعة وصحية و محمية من كل المشاكل اللي ممكن تتعرض ليها مع مرور الوقت زي التجاعيد والحبوب و غيرو..
اي سيروم مُشكلته الوحيدة انه برغم كل اللي بقدمه للبشرة يفتقر لخاصية الترطيب، بغذي وبعالج لكن ما برطّب، امتصاصُه سريع جداً و ما بيفضل على السطح كتير لأن شُغله كله في الطبقات العَميقة، عشان كده لااازم بعد تستخدميه ب10 دقايق ل ربع ساعة تستخدمي كريم مُرطب عشان يرطب و يحبس مكوّنات السيروم داخل طبقات الجلد عشان تشتغل بأقصَى فعاليّة، يعني السيروم والمرطب هم مكملين لبعض، في حال قررتي تستخدمي سيروم ما ينفع ابداً تستغني عن المرطب..
طيب نتكلم بِشكل خاص عن تجربتي مع سيروم مُعين و هو من منتجات تقوى الأحمدي طبعا معروفة بالنسبة ليكم..
السيروم دي التجربة التانية لي معاه لأنه فعلياً عجبني و أثبت جدارته بعكس اللي كنت متوقعاه..
في التجربة الاولى في حاجات كتير ما حبيتها،
اولاً العبوة كانت بخاخ، سيروم بخاخ ما كان شي مقبول ابداً لأنه التحكم بالكمية صعب جداً و ممكن كمان يدخل في العين، كنت برش على يدي اول و بعدين امسح منها وشي و كده بحسه اتأكسد خلاص و ما فيه فايدة لأنه حساس جداً للضوء والهوا..
ثانياً قوامه كان رقيق(زي ما شايفين في الصورة) حسيته موية ورد و مدوبين فيها فايتمين سي فوار! خلاص هنا نفسياً قنعت منه و بقت مواصلة فيه بس و ما مستنية منه شي!
لحدي ما جا وقت حسيت بشرتي حرفيااا(رغم اني م بحب كلمة حرفياً دي لكن معبرة😂) حرفياً حرفياً بقت ناعمة و مشدودة و لونها افتح، حسيت بنعومة ما حصل وصلت ليها في حياتي حتى الاسكربات وكريمات الترطيب ما حصل نقلتني ل ال level ده من النعومة والنضارة.. شي فعلاً خرافي و مَتعوب عليه..
لاحظت كمان انه قابض للمسام كنت قايلاها نتيجة لحظية لكن فعلا المسام صغرت، و الدهون قلّت و بشرتي عموماً بقت ناعمة و فيها اشراق واضح..
طلع ما قليل اللي كنت مستهترة بيه!!
المهم بعد خلص طلبت تاني، أملاً في انه المرة دي تجيني العبوة حقت القطارة، لكن جاتني عبوة ب غطا عادي زي حقت الدواء 😊 استغربت اكتر من المرة الاولى، انو كيف اتعامل معاها، افتحها يعني عادي كده و اخلي السيروم يضربو الهوا و يخرب ولا دي مصيبة شنو؟
وصلت لإني احاول ما افتحه ع الآخر و انقط كم نقطة ع يدي و اعملو سريع (في الضلام طبعاً) يعني طريقة بدائية جداً و الكلام ده بكون خصم ع الفعالية حقتو.. و فعلا المرة دي ما اداني النتيجة حقت البخاخ لكن العليهو ما هين كويس انه قادر يقدم حاجة بعد التعبئة دي، و ده يدل ع انو المواد فعالة، العيب من التعبئة ما كانت موفقة..ياريت يجتهدو بس ع الموضوع ده ..
تقييمي للسيروم 10/7
سعره ممتاز بالنسبة للسيرومات الجاهزة
بينفعك شديد خاصة لو كنتي بتستعملي كريم للتفتيح، بسرّع النتائج لأنه بطلع القشرة اول بأول و بنعم (رغم انه بيفتح اصلا بدون كريم)..
دي كانت تجربتي ان شاءالله تستفيدو منها، انا نفع معاي يمكن ينفع مع غيري او لأ لأن البشرات بتتفاوت في حساسيتها و درجة استجابتها❤️
ليست هناك تعليقات:
إرسال تعليق