مراهم التقشير سر البشرة الصافية

عندك حبوب و آثار ؟

مسامات و رؤوس سوداء ؟

بشرتك دُخانيّة ؟!

اللي هي في علم التجميل البشرة الشاحبة شُحوب يخليكي ما قادرة تتعرفي عليها مشكلتها شنو و المزعّلها شنو ! تحسيها كده مطفية و ما فيها لون واضح ولا نضارة ..

الحل هو رُوتين عناية بسيط جداً بيعتمد على التقشير

انا بسميه [روتين حَياة] لبشرتك ..

عشان تبدي تبثي فيها الحياة من جديد شيلي الطبقة المليانة بلاوي دي و استقبلي طبقة جديدة و اعتني بيها صح من ناحية ترطيب و نظافة و حماية من الشمس ..الخ

التقشير الدوري يا جماعة هو سر حياة البشرة و تجدّدها، حوريكم اسماء بعض المقشرات الطبية الآمنة حسب المواد الفعّالة .. عشان ما تتقيدو بإسم او شركة معيّنة، التقشير بيشتغل على كل الحاجات في وقت واحد، بيخلصّك من حب الشباب و يحميك من انه يظهر تاني و نفس الشي بالنسبة للرؤوس السوداء بيمنع تكوينها، بيعمل تحفيز مُباشر للكولاجين واللي هو سر النضارة والشباب بالتالي حيرمّم الخطوط الرفيعة و الندوب، بقشّر و بشيل كل التصبغات والآثار و النتيجة حتكون لون موحّد و بشرة ناعمة، حتى مشكلة المسام الواسعة حتخف تدريجياً.. 

المقشرات دي اللي هي الريتينويدات ..عبارة عن مُشتقات فايتمين A اللي هي :

📍 تريتينوين Tretinoin 

الأسماء التجارية ليهو زي :

1- رتن إي Retin_A :

مُلاحظة : ده بينفع في حالة الحبوب الدهنية الغير ملتهبة 

2- أكرتين Acretin :

جميل جداً و ناس كتار معتمدين عليه لكن عايز صبر على اثارو الجانبية في البداية

3-افوتين تبع شركة Avalon. 

3- تريتينيون كريم(يعني متوفر بنفس اسم المادة) 

ممكن يتلقي صافي و ممكن تلقوه في المراهم مضاف ليه  هيدروكينون لزوم التقشير و التفتيح مع بعض في وقت واحد .. زي كريمات الخلطة الثلاثية  تريتوسبوت_ميلانوفري_بيجمانورم_اماليكو..ااي هم كريمات طبية لكن سُمعتهم اتشوهت باستخدامهم الغير رشيد، في طريقة معينة للاستخدام

📍 أدابلين Adapalene :

عنده اسماء تجارية كتيييرة منها

ماربلين - ديفرين - درايفا جل-ابيدو جل(ابيدو ده بالذات مناسب للعندهم حبوب ملتهبة لأنه فيو مادة اسمها بنزويل بيروكسايد دي مضادة للبكتيريا) 

من المقشرات المحببّة لنفسي و تجربتي معاها طويييلة و نافعة معاي جداً ..مع العلم انو بشرتي-كأغلب البنات- دهنية 

الطريقة الصحيحة للاستخدام :

في حاجة خليها ف بالك.. المقشرات بتحتاج تمرين للبشرة، زي التمارين الرياضية في الاول بتتعب العضلات، نفس الشي المقشرات في الاول ممكن تهيج البشرة ف ما تخافي، ابدي بالتدريج مثلا نص ساعة ف اليوم لحدي م توصلي ساعتين و تاني ممكن تنومي بيها عادي .. 

الكمية و الوقت المُناسب للاستعمال و عدد المرات اللي حتستخدمي فيها العلاج حتفرق معاك جداً، سواء اخترتي اي نوع من المقشرات السابق ذكرها حاولي ان الكمية ما تتجاوز (حبة البازلاء) يعني كمية بسيطة جدا،  الاستعمال يكون بالليل بس و 3 مرات في الاسبوع كأقصى حد لحدي ما تتعودي عليها ممكن تعمليها كل يوم عادي، الكريمات دي اي رهيبة و كلمة رهيبة شوية عليها لكن عايزة تعامل بذكاء عشان تتجنبي آثارها الجانبية من احمرار و حكة وقشرة شكلها ممكن يكون مزعج.. 

⚠️تحذير : المستحضرات دي ممنوعة للحوامل و حتى المخططين لحمل يوقفوها قبل شهرين ع الأقل 

* ملاحظات مهمة :

فترة التقشير بتكون بشرتك حسّاسة و فيها جفاف(حتى لو كانت في الاصل دهنية) ،اهتمي شديد بالترطيب و اتجنبي السنفرات و الفيشل والحاجات دي، كمان ما تغسلي وشك كل شوية ع الفاضي والمليان عشان ما تزيديها جفاف،هم تلات مرات غسيل ف اليوم كفاية جداً و ياريت نبعد عن الصابون خاصة اصحاب البشرة الجافة.. 

كمان الشمس بتشكل خطر كبير في الفترة دي و ممكن تعمل ليك حروق، استخدمي واقي الشمس اذا متضطرة تطلعي، على حظكم الحلو ده انسب وقت عشان تبدو في العلاج، استغلو فترة الحظر و عالجو بشرتكم 😂

الاستعمال يكون على بشرة نظيفة و تاخدي الكمية الصغنونة اللي اتفقنا عليها قبيل و تمسحيها على كامل وشك(مش بس الحبوب او الاثار نفسها)، لأنه قد تكون في حبوب تحت الجلد انتي ما شايفاها، غير انه المقشرات دي عموماً مفيدة لبشرتك.. 

ضروري جداً ما تتعرضي لأي إضاءة وقت الاستعمال (حتى اضاءة الغرفة العادية) لأنها بتقلل من فعالية كريم التقشير..يعني امسحي وشك و طفي النور و ما تسلطي اي ضوء عليك حتى شاشة الجوال.. 

و بس دي اهم حاجات❤️