تلاتة من أقوى العناصر الطبيعية اللي اثبتت فعاليتها في علاج مشاكل الشعر، متوفرة و في متناول اليد، تقريباً موجودة في كل بيت..
📍عصير البصل :
- غني بالكبريت بيحمي الشعر من التكسّر و بقويه و يخليه مرن، كمان مطهّر للفروة
- بيحافظ على فروة صحية و بيمنع أي التهاب ممكن يصيبها و بحميها من القشرة والفطريات و حتى القمل
- غني بمضادات الأكسدة اللي بتحمي الشعر من الشيب المبكر و بتحافظ على نموه
اتعملت دراسة على مجموعة من الناس عندهم مناطق في الفروة ما فيها شعر نهائياً نتيجة مرض يعني الشعر وقع ليه فترة طويلة..
عملو ليهم عصير البصل في المناطق دي يومياً لمدة شهر والنتيجة كانت 73% منهم (و دي نسبة ما ساهلة) شعرهم نبت من جديد
واصلو الحكاية دي 3 شهور لقو انه 88% شعرهم نبت،
فلو انتي عندك فراغات او عايزة بيبي هير او مجرد انك عايزة تغزري شعرك ادخلي على البصل بقلب قوووي، في ناس عندهم حساسية من البصل بيعمل ليهم حكة و آثار جانبية مزعجة فلو انتي منهم ابعدي عنه تماماً، مشكلة الريحة القوية حقته ممكن تخليك تفكري الف مرة قبل تستعمليه خاصة انه لازم يوم بعد يوم، بس انا بشوف ان الريحة محلولة ما اظن تكون عائق قُصاد النتيجة اللي حتشوفيها في فترة وجيزة، غسلي بشامبو ريحته حلوة و اعملي البلسم ضروري عشان شعرك ما يتضرر بالغسيل الكتير، و في النهاية هو احسن بكتير من بخاخات المينوكسيديل زي الهيرقرو اللي حتديك نتيجة رهيبة لكن بعد توقفيها حيحصل شنو؟! 🤔الشعر الجديد اللي تعبتي عليه و نبت حيتساقط كأنك ما عملتي شي، غير انه ممكن يلخبط ليك هرموناتك ممكن يطلع ليك شعر في الدقن والجسم و يعمل تكيس مبايض و حاجات انتي في غنى عنها.. عشان كده بنقول الطبيعي احسسسن، اي حاجة كيمائية تدخل الجسم عندها ضريبة بتتاخد من صحتك، حاجات في منتهى الدقة ولا يمكن في يوم تتخيلي انه عندهم علاقة ببعض..
📍زيت جوز الهند الصافي الاصلي :
لو اتعمل على الشعر والفروة تلات مرات اسبوعياً و اتساب ليلة كاملة على الشعر حيحصل الآتي :
- كل البكتيريا الضارة و الشوارد الحرة حولين البصيلات بتموت
- التغذية داخل الشعرة بتزيد بنسبة 40% من كتر ما هو مليان مغذيات فايتمينات ومعادن و احماض امينية، باختصار زيت جوز الهند هو ال super food للشعر
📍الكركديه حقنا ❤️
الدراسات والتجارب اثبتت ان الكركدي لما يتغلي(الأوراق و الجزوع مع بعض اللي هم زي الخشب الصغار ده بكون مع الكركدي) بيعمل حاجة ممكن نقول عليها إعادة إحياء للبُصيلات الميتة او الخاملة، يعني الشعرة الماتت و وقعت و بصيلتها بقت ما بتطلع شعر تاني حيديها دفعة بالعناصر اللازمة العنده و يحييها من اول و جديد..عرفتو ليه انا بحبه؟ قبل كده كتبت عن طريقة عمل سيروم الكركديه للبشرة فوائده لا تُحصى حقيقي كنز من كنوز الطبيعة..
جربي الحاجة المناسبة معاك و استمري عليها فترة كافية بتشوفي الفرق ان شاء الله ❤️
ليست هناك تعليقات:
إرسال تعليق