الكوركتر هو مُستحضر لتصحيح عيوب البشرة و مُعادلة و توحيد لونها، يعني ما كل واحدة محتاجاه الا اللي عندها عيوب واضحة في البشرة (اذا بشرتك عيوبها خفيفة اكتفي بالكونسيلر فقط)..
الكوركتر شكله و قوامه يشبه الكونسيلر (خافي العيوب لكن الفرق انه مُخصّص للتصحيح و معالجة فروق الألوان في البشرة، و ده الشي اللي ما يقدر يعمله الكونسيلر لوحده ، الكونسيلر يخفي او يغطي فقط..
طيب بالنسبة للي حتستعمل الكوركتر المصحح لازم تعرفي انه يكون أول طبقة (بعد كريم الترطيب او البرايمر) لأنه بشكّل بيز او قاعدة للكونسيلر تسهّل عليه المهمة، يعني اذا اكتفيتي بالكونسيلر لوحده ما حتلاقي النتيجة المرضية، حتكون البقع او الهالات عاملة لون غريب اقرب للرمادي، عشان كده لازم تتم مُعالجتها اولاً بعدين يجي دور التغطية..
الصورة بتشرح كيف بيظهر اللون الرمادي في البشرة و هي مشكلة بتواجه اغلب البنات..
الكونسيلر اصلاً افتح بشوية من لون البشرة ف بالتالي بدل ما يخفي الهالات حيفتح لونها، و لما لونها الداكن يجي عليه كونسيلر بيج النتيجة حتكون رمادي بامتيااز 😊
*استخداماتـه :
المصحح الاخضر يستخدم للبقع الحمراء سَواء كانت حب شباب أو شُعيرات دموية باينة على سطح البشرة (يتعمل على البقع فقط مش على كامل الوجه) 👍🏻
المصحح البرتقالي للهالات و آثار الحبوب و السمار حول الفم و اي شي لونه من درجات البُني ، وكل ما زادت حدة الهالات تستخدمي لون برتقالي اقوى، زي ما باين في الصورة.
اذا بشرتك باهتة و ناقصة اشراق تستخدمي مصحح بنفسجي لكن المرة دي على كامل الوجه.
اذا عندك كَدمات لونها بنفسجي تستخدمي مصحح اصفر فاتح، واذا كانت زرقاء مصحح خوخي.
اللون البرتقالي المحمَر لإخفاء الهالات و البقع لذوات البشرة الداكنة.
عموماً اتبعي دائرة الألوان اللي في الصورة (كل لون يستخدم لتغطية اللون اللي مقابله)..
*ملاحظة :
الهالات اللي بنشوفها لونها بني هي في الحقيقة لونها أزرق او بنفسجي بسبب نقص الاوكسجين و عوامل تانية.
طريقة التطبيق :
في حاجات مهمة جداً و بتفرق معاكم جداً في النتيجة النهائية، لازم تتعاملي بخفّة يد و ذكاء مع الكوركتر، الكمية اللي بتاخديها تكون بسيطة ما تلوني وشك كأنك بترسمي لوحة! خليكي فنانة و داري على عيوبك بلمسات خفيفة كأنك بتعملي تمويه.
ثانياً الدمج، لازم تدمجي كويس جداً..
و بس اتمنى اكون قدرت اوصل ليكم كل المعلومات اللي محتاجينها❤️
ليست هناك تعليقات:
إرسال تعليق