واقي الشمس من اهم مستحضرات العناية و بدونه كُل شي ناقص، يعني اتخيلي تكوني مهتمة و مجتهدة مع بشرتك و الشمس تخرب عليك كل شي عملتيه، اذا بتتعرضي للشمس يومياً ضروري تستخدميه و في حال كنتي بتعملي تقشير او تفتيح هنا لازم تكوني حريصة اكتر على استخدامه لأن ن بشرتك بتكون حسّاسة فوق العادي، اغلب البنات بواجهو صعوبة في اختيار واقي الشمس و دائماً في حالة شكوى من انه بيسمّر البشرة او بيطلع حبوب و غيره كتير من المشاكل ، ده كله بسبب الاستخدام الخاطيء او قلة المعرفة ببعض المعلومات اللي بتشكل فارق كبييير..
كل التساؤلات في بالك حتلاقي جوابها في التدوينة دي ان شاء الله..
واقي الشمس هو بِبساطة مُستحضر يوضع على الجلد يساعد على منع الأشعة فوق البنفسجية إنها تصل لبشرتك..عنده اشكال كتيرة و متنوع حسب احتياجاتك..في منه جل و كريم و بخاخ
اهميته :
ليه لازم نحمي نفسنا من الأشعة فوق البنفسجية بنوعيها (UVA, UVB) ؟!
الاشعة دي بتسبب مشاكل كتيرة زي تَلف الجلد، الحروق، ظهور التجاعيد و علامات تقدُّم السِن في الجلد(الشيخوخة المبكّرة) والتصبُّغات و كمان بتزيد من احتمال الإصابة بسرطان الجلد..
طيب الأشعة فوق البنفسجية من نوع B اختراقها أقل و هي المسبّب الرئيسي لحروق الشمس، أما النوع A اختراقها للجلد أعمق و بتسبب التجاعيد و علامات تقدم السن بصورة اكثر حِدة..
عامل الحماية SPF :
هوإختصار لـ Sun Protection Factor اللي هو عبارة عن مقياس لقُدرة واقي الشمس على الحماية من الأشعة ،، يعني شنو لما نلقى مكتوب مثلاً SPF 15 ؟!
يعني إذا كان الوقت اللي بياخده جلدك المكشوف للشمس عشان تترك اثر عليه هو 20 دقيقة -طبعا كل شخص بيختلف عن التاني، دي حاجة بتقيسيها انتي بالملاحظة-معناه لما يتعمل الواقي SPF 15 حيضاعف وقت الحماية دا 15 يعني 5 ساعات..
اعتقادات خاطئة و منتشرة حوله :
❌ كلما زادت نسبة ال ( SPF) زادت الوقاية !
رغم انه منطقياً ممكن نفكر ان الواقي 100 SPF حيدينا حماية ضِعف حماية 50 SPF ،، لكن الحقيقة انه الاتنين بيختلفو بفارق بسيييط جداً
الواقي بنسبة 15 SPF بيحمي بنسبة 93 %..
- 30 SPF بيحمي بنسبة 97 %
- SPF 50 بيحمي بنسبة 98%
- SPF 100 بيحمي بنسبة 99%و
SPF 30 المناسب لأغلب الناسل
: في حالات معينة محتاجة حماية اكتر
للي بشرتهم فاتحة جداً لأن الميلانين اللي بيشكل حماية طبيعية من الشمس هم عندهم قليل عشان كده محتاجين حماية اكتر من غيرهماصحاب الحساسية الضوئية المصابين بمرض الذئبة الحمراءاللي عندهم تاريخ اصابة بسرطان الجلد
❌مفروض نستخدم الواقي على الاماكن المكشوفة للجسم بس
لأ لأن الملابس بتحمي الجلد بنسبة 7 SPF فقط ..خاصة الأقمشة الغامقة و المموجة ..عشان كده لأفضل حماية نعمل واقي الشمس على جميع أجزاء الجسم ،الخارجية طبعا..
❌واقي الشمس بيمنع تكوين فيتامين د
اكيد غلط لأن حتى مع واقي الشمس الجلد بياخد كفايته من الجزء المفيد من أشعة الشمس، الواقي وظيفته انه يحجب الاشعة الضارة بس ..
أنواع واقي الشمس (الفرق بين sunblockو sunscreen) :
sunblock واقي الشمس الفيزيائي :
بيحتوي على مكونات طبيعية بتستقر على سطح الجلد وبتعمل كحاجز للبشرة بتعكس الاشعة الضارة ..لتقريب الفهم ممكن نشبهو بالمرايا يعني بيعكس الاشعة بعيد قبل تدخل للجلد، مشكلة النوع ده انه بيعمل لون واضح على البشرة،، و بتكون فعالة بس اثناء ما بتكوني ماسحاها يعني لو مسحتي الكريم او غسلتيه خلاص يزول مفعولها ..
أمثلة للمواد الفعالة في الواقيات الفيزيائية Zinc oxide, Titanium dioxide ,Avobenzone .
مميزاته :
بيوفّر حماية فورية من الشمس لأن المواد اللي فيه بتبدا عملها بمجرد وضعها على الجلد يعني ما لازم تعمليها قبل تطلعي بفترة
تكلفتها قليلة و ما بتسبب حساسية
sunscreen واقي الشمس الكيميائي :
بحتوي على مكونات كيميائية بتمتص الاشعة فوق البنفسجية و بتتفاعل معاها و تمنع وصولها لطبقات الجلد ،بتحولها لطاقة بعدين لحرارة لحدي ما تختفي كلياً، ممكن نشبهو بالاسفنجة، امثلة للمواد الفعّالة فيها :
افوبينزون (Avobenzone)
اوكسي بينزون (Oxybenzone)
وحمض بارا أمينو بنزويك (PABA) ،
في ادّعاءات كتيرة بتقول ان الواقيات الكيميائية خطرة على البشرة و ممكن تسبب حساسيات لكن مافي دليل يثبت كدا .. بس للضمان يفضل استعمال الواقي الفيزيائي
*ملاحظات مهمة :
* دايما اختاري واقي مكتوب عليه العبارة دي broad-spectrum يعني واسع المدى ( بيشتغل ضد انواع الأشعة الضارة الطويلة المدى والقصيرة ال UVA و ال UVB ) ،، لازم تنتبهو لما تجو تشترو الواقي انو يكون مكتوب عليه SPF و حاجة تانية زيcontain UVA filters يعني بحتوي على فلتر للاشعة UVA..
*اختاري واقي يكون مقاوم للموية عشان يثبت لفترات اطول
*حاجة تاني مهمة، حاولي تختاري المكياج المحتوي على عامل حماية من الشمس ، و الارواج و مرطبات الشفايف برضو لأنو الشفايف زي باقي الجسم بتسمّر مع الشمس ..
كيف نحسب الزمن المحتاج ليه الجسم للحماية من الشمس و على اساسه نحدد نسبة ال SPF المحتاجها ؟
بما ان الشمس غالباً بتستغرق 10 دقايق عشان تترك اثر على الجسم زي الإحمرار البسيط او الإسمرار .. في الحالة دي حنضرب ال SPF دا في 10 ،، يعني لو إخترتو واقي شمس SPF 36 ،، حتضربو ال 36 في ال 10 (دقائق) القبيل .. كدا حتعرفو إنو حتكونو آمنين تحت الشمس لمدة 360 دقيقة اللي هي 6 ساعاات ..
و لو حبيتو اكتر من 6 ساعات حتختارو واقي بعامل حماية اكتر من 36 ..
الإختيارات دي بتختلف حسب تعرضكم للشمس ..
طريقة الاستعمال الصحيحة :
على بشرة نضيفة مغسولة و جافة تاهدي الكمية المناسبة للإستعمال بحيث تكون طبقة رقيقة فوق البشرة .. يعني ما تعملي كمية بسيطة شديد ولا كتيرة شديد، اذا كان الواقي كيميائي بيتعمل قبل التعرض للشمس ب 15_30 دقيقة .. اذا كنتي بتعملي مكيااج حتعملي واقي الشمس أول قبل أي شي .. بعد 10 دقايق البشرة حتمتصاه فممكن بعدها تعملي مكياجك عادي، اذا كان فيزيائي ممكن تعمليه قبل تطلعي مباشرة..
لأفضل حماية إذا كنتو بتتعرضو للشمس لفترات طويلة جددو الكريم كل ساعتين ..
كيف تختاري واقي الشمس حسب نوع بشرتك ؟
البشرة الدُهنية والمختلطة :
بناسبها واقي شمس شكل جِل خالي من الزيوت oil free
مثلاً :
- صن بلوك لاروش انثيليوس للبشره المختلطه Anthelios XL SPF 50+ Gel-Cream
- صن بلوك لاروش بوزيه للبشرة الدهنية Anthelios XL SPF 50+ Shaka Fluid
- صن سكرين نيتروجينا NEUTROGENA Ultra Sheer Dry-Touch SPF 70
البشرة الجافة :
بناسبهآ واقي شمس كريمي و فيه نسبة ترطيب
مثلاً :
- صن بلوك لاروش للبشرة الجافة Anthelios Ultra SPF 50+ Cream
البشرة الحساسة :
بناسبها كريم واقي شمس يكون تركيبته طبية و معزّز بالفايتمينات بالأخص فايتمين e و خُلاصات النباتات المهدئة للبشرة زي الالوفيرا .. و يكون خالي من العطور والمواد المثيرة للحساسية زي الموجودة في الواقي الكيميائي
عموماً في ماركات كتيرة زي اللي ذكرتهم و غيرهم كتير شوفو المناسب معاكم حسب المكونات و طبيعة بشرتكم❤️
ليست هناك تعليقات:
إرسال تعليق