اليوم حتكلم عن قشرة الشعر ، المشكلة الحقيقية اللي بعاني منها اغلبنا، لدرجة ان في ناس بقو مُتعايشين معاها لأنهم خلاص ممكن نقول فقدو الامل في علاجها نهائياً ، و انا كنت منهم و عانيت منها لفترة طويلة و جربت كل شي ممكن يخطر على بالكم قبل اعرف الطريقة الصحيحة في حين انها اسهل ما يكون، واتخلّصت منها الحمدلله و حوريكم كيف..
اول شي عشان تكونو على دراية بكل التفاصيل لازم نفهم شنو أنواع القشرة و اسبابها و تأثيرها على الشعر..
*انواع القشرة :
- دُهنية
- جافّة
و الاكثر انتشار و ضرر هي القشرة الدُهنية .. لأنو هي السبب في تساقط الشعر ، لأنها غآلباً بتكون عند الناس اللي فروتهم في الاساس دهنية فالدهون دي بتترسّب في البصيلات و " بتخنقها " بالتالي الشعر ممكن يقع او لما يطلع بكون ضعيف جداً
اما الجافة ما بتسبب اي تساقط ، ف لو كان عندك قشرة جافة و عندك تساقط اعرفي انو التساقط ما منها ، قد يكون من نقص فايتمينات او حديد او اي سبب تاني
*كيف اعرف نوع القشرة ؟
طبعاً القشرة الجافّة بتلاحظيها مايلة للون الابيض و جافة بتنزل و تتناثر على ملابسك و اكتافك اثناء التسريح او بمجرّد اللمس..
اما القشرة الدُهنية بتلاحظي الفروة دايماً ملمسها دُهني و الحكة شديدة و مزعجة جداً ، مرات بتظهر حبوب في الفروة بسبب تراكم الدهون في البصيلات .. كمان بتغير ريحة الشعر اذا ما اهتميتي بغسله بصورة منتظمة..
..
*خُطة العلاج :
معظم الناس العندهم قشرة ما قدرو يعالجوها ابداً لأنها محتاجة خطة و روتين محدد تمشي عليه، يعني انا لو عندي قشرة و مشيت جبت احسن شامبو ضد القشرة في العالم و مبسوطة على اساس المشكلة حتتحل ، و في الحقيقة ما حتتحل بل ممكن تزيدي الطين بل..
الروتين الصحيح كالآتي :
العلاج مدته ثلاث شهور
كل شهر حتستعملي نوع شامبو مُضاد للقشرة مختلف عن الشهر اللي بعدو ..
طيب ليه التعب ده كله ؟ و ليه ما ينفع استخدم نوع واحد طول الفترة؟
الناس المشوارهم طويل مع القشرة تعالو اسألكم 👀 .. لما تجيبي شامبو معيّن للقشرة مش بتحسي انه ماشي معاك تمام و نتيجته روعة اول شهر بس و تاني القشرة بترجع و اقوى من الاول ؟؟ اكيد لاحظتو
السبب ان الفطريات مع الوقت بتتعرّف على الشامبو و بتتعوّد عليه و تبدأ تقاومه و تطوّر نفسها ضده ، عشان كده لازم نفاجئها كل شهر بشامبو جديد ، و بعد ال3 شهور تخلص حنرجع تآآني للشامبو الاول و بعده التاني و هكذا ..لحدي ما تتخلصي من المشكلة بعدين توقفي بالتدريج و تعتمدي نوع واحد و بعدها بتقدري ترجعي لروتين حياتك الطبيعي بالتدريج..
الحاجات دي ما كتيرة ولا عايزة ميزانيّة ، لأنو ال3 شامبوهات دي بتفضل معاكي بالسنين و كل شهر بتبدّلي بيناتهم هم نفسهم ، يعني ما حتشتري كل فترة
*أسماء لشامبوهات ممتازة تستخدموها في خطة العلاج و ترتيبها حسب الأقوى :
- الشهر الأول : شامبو [ كلوبكس Clobex ] لأنه اقوى واحد و فيه كورتيزون موضعي قوي ما بسبب اي ضرر ما تخافو ..
✔البديل : تاخدو اي شامبو بحتوي على كورتيزون.
- الشهر التاني : شامبو [ ايونيل Ionil T ]
✔البديل : اي شامبو مكتوب ضمن مكوناتو Tar اللي هو القطران .
- الشهر التالت : شامبو [ نيزورال Nizoral ].. او شامبو [ داندو Dando Free ] .. او ممكن تستبدلوهم بشامبو هيد آند شولدرز او اي شامبو ضد الفطريات
* حاجات مهمّة لو ما عملتيها ما حيفيدك العلاج :
- اولاً : تستخدمي الشامبو على شعر مبلل بتاخدي شوية من الشامبو و تفركي بيها فروة الراس و تخليها بين 10_15 دقيقة " لو ما التزمتي بالزمن ده ما حيفيدك " .
- ثانياً : لازم تستخدمي الشامبو يوم بعد يوم لو شعرك دهني ، او كل يومين لو شعرك جاف ما ينفع تستخدميه يومياً نهائي !
- ثالثاً و الأهم : بالنسبة للترطيب اليومي، الفروة ما تعملي ليها اي زيوت او كريمات او ماسكات ، انتي في فترة علاجيّة حساسة عشان كده أنسي ماسكات البيض و الجرجير و الكلام ده ، و الزيوت و بخاخات تكثيف الشعر.. إلخ ، بالنسبة للترطيب اليومي ترطبي الشعر بس بالكريم المناسب معاك(تاخدي في يدك كمية مناسبة و تمسحي على الشعر بس) ، الناس اللي شعرهم جاف محتاج ترطيب عالي ممكن تستخدمو زيوت لكن بشرط ، الزيوت دي ما تصل الفروة نهائياً
الحاجات اللي قلتها دي عن تجربة شخصيّة ، التزمو بيها حرفياً و حتشوفو نتائج تفرحكم و حتنتهي معاناتكم مع القشرة للأبد ان شاءالله❤️
*سؤال مهم، هل في ناس معرضين للقشرة اكتر من غيرهم ؟
ايوه في عوامل مُعيّنة ممكن تكون سبب في ظهورها عند بعض الناس، مثلاً :
- الاستِعداد الوراثي
- البشرة الدُهنية المتهيّجة او الحساسّة ، هي حالة بسمّوها (التهاب الجلد الدهني) و في الحالة دي القشرة بتكون في اصعب حالاتها
- عدم غسل الشعر بالشامبو بشكل كافٍ او بطريقة غلط و عدم تقشير الفروة بشكل دوري ممكن يؤدي إلى لتراكم خلايا الجلد الميت والدهون في الفروة
- نوع معين من الخميرة اسمها (الملاسيزية) بتصيب الفروة و تتغذّى على الافرازات الدهنية فيها و تسبب نمو خلايا الجلد و تجديدها بوَتيرة أسرع ف بتتقشّر و تتراكم مكونة طبقات اللي هي القشرة
- الاجهاد والضغط النفسي المُستمر بخلي المشكلة تتفاقم لأنه بيضعف جهاز المناعة في الجسم
- أحياناً السبب بكون حساسيّة من بعض مُنتجات العناية الشخصية بينتُج عنها التهاب الجلد التماسي اللي بخلي الفروة مُلتهبة
دي بعض الاسباب، القشرة عموماً ممكن تظهر في اي وقت و لأي شخص بس في الغالب بتظهر في سن الشباب، كمان ممكن تكون نتيجة لامراض معينة او خلل في الهرمونات او ضعف في المناعة، ممكن تكون موسميّة تظهر في فصول معينة زي الشتاء والخريف..
*متين مفروض تقابلي طبيب مختص ؟
الخبر الحلو انو غالبيّة الناس بستجيبو للعلاج من اول مرة، اذا استمريتي في الخُطة العلاجية و ما لقيتي تحسُّن لازم تراجعي الطبيب عشان تستبعدي اي امراض جلدية زي الاكزيما او الصدفيّة او عدوى فطرية و غيرها..
و بس ده كان كُل شي بتمنى تستفيدو و تجربو و ان شاء الله تلاقو افضل نتائج❤️
ليست هناك تعليقات:
إرسال تعليق