استخدامات و فوائد سحرية لكريمات التقشير

 

مساء /صباح الجمال❤️

في تدوينة سابقة اتكلمت بإسهاب عن مُستحضرات تقشير البشرة انواعها و طريقة استخدامها و كيف تختاري المناسب لبشرتك..للاطلاع اضغطي هنا

اليوم حنشوف استخداماتها التانية غير انها بتعالج حب الشباب وآثاره، الاستخدامات اللي اغلب الناس يمكن ما عندها فكرة عنها و هي تعتبر حلول سحرية فعلاً لأغلب المشاكل اللي بنعاني منها.. 

تنبيهات سريعة قبل ندخل في الموضوع :

لو ناوية تستخدمي مقشر و انتي بتطلعي في الشمس كتير او بتتعرضي ليها حتى لو جوة البيت لازم و لابد تجهزي واقي الشمس اولاً و ما تستهيني بالموضوع ده.. اتكلمت في المدونة عن واقي الشمس و طريقة استخدامه عشان تعرفي اكتر اضعطي هنا

ثانياً المقشرات دي بتستخدميها بالليل بس و لمدة ساعتين بالكتير ، لأنها حسّاسة جداً للضوء و بتفقد فاعليتها ، عشان كده افضل استخدام انك تمسحيه سريع و انتي على وش نوم ، حتى ضوء التلفون العادي لو بتتصفحي و انتي ماسحة الكريم على وشك و الضوء عاكس عليه حيأثر في فعاليته.. 

استخدامات و فوائد سحريّة :

• للتخفيف من الخطوط البيضاء "علامات تمدُّد الجلد Stretch Marks" :

رغم ان علاجها صعب جداً حتى بأحدث التقنيات لكن المقشرات اثبتت فعاليها في التخفيف من حدة علامات التمدد، في الحالة دي عادي ممكن تستخدمي المقشر عليها اكتر من مرة في الاسبوع ، لأن بشرة الجسم ما حساسة زي الوش .. مع الاستخدام المنتظم حتلاحظي تحسّن في مظهر الجلد و الخطوط حتخف كتييير "عن تجربة" .. لأنو المقشرات دي بتجدد الجلد و بتحفز انتاج الكولاجين في المنطقة ..

• تفتيح و تنعيم المناطق الخشنة :

(الركب/الاكواع/المفاصل/كعب الرجلين) ، المناطق دي سبب سمارها و كرمشتها هو الجفاف ، الجلد فيها قاسي و صعب التخلص منه ، استخدمي عليها واحد من المقشرات دي و كل ما تقشري طبقة حتتجدد الخلايا و حتكون انعم و افتح ..و لازم تهتمي بالترطيب عشان الجلد الميت يطلع اول بأول.. 

• حل لكل المشاكل البتأزّم صاحبات البشرة الدهنية خاصة :

( مسامات / رؤوس سوداء و بيضاء / دهون كتيرة كتيرة في كل مكان / حب الشباب ، و تطُول المعاناة ..)

دي كلللها علاجها هو التقشير الدوري ، تختاري اللي يريحك من المراهم دي و تعتمديه على المدى الطويل .. بعد شهور قليلة من التقشير المنتظم حترتاحي نفسياً و تستمتعي ببشرة صافية.. 

• علاج / وقاية من علامات تقدُّم السن :

( التجاعيد بأنواعها / الكلف / نقص الكولاجين و شُحوب البشرة ) ..

فلو عايزة تحمي نفسك و تحافظي على شبابك قبل وقوع المشكلة ، ابدي من بدري اهتمي بالتقشير و الترطيب ، لأنه كلما عمرك ماشي يكبر " خاصة بعد ال 25 " انتي هنا في خطر لأن مستوى الكولاجين في بشرتك ماشي في نازل .. و زي ما قلت ليكم المقشرات دي بتزيد مرونة الجلد و تجدّد الخلايا و بتحفز انتاج الكولاجين بشكل ملحوظ و ملموس و تحفيزه بالطريقة دي هو الصح لأن كريمات الكولاجين خدعة تجارية كبيرة و مافي منها فايدة، في شي تاني حيساعدك في الموضوع ده جداً اللي هو الديرما رولر، لو اعتمدتيها هي والتقشير ح تنعمي ببشرة شابة و نضرة طول العمر❤️