أفضل خُطة علاجيّة للحبوب و الآثار

جرّبتي مُنتجات كتيرة لِعلاج الحبوب و الآثار و لسه بتعاني؟؟
تعالي يمكن في شوية حاجات رايحة عليك 😊

اولاً كوني صَبورة، علاج حَب الشباب لازم تصبري عليه أقل شي شهر قبل تحكمي عليه انه ما نافع، اذا فضلتي تضغطي على بشرتك و تغيّري المنتجات كل مرة حتهلكيها و تخليها ما تستجيب تاني لأي علاج..

 النتائج النهائية بتشوفيها في 3 شهور و خلال الفترة دي بتلاحظي تحسّن تدريجي.. 

الخطة حتكون كالآتي :

اولاً : 

ابدي بداية واعية بإنك تعرفي شنو المستحضرات اللي حتعالج مشكلتك، و حتعالجها كيف؟
طبعاً الحبوب و الآثار حلها هو التقشير ولا شيء غير التقشير، يعني تستخدمي مقشر مُش خلطة او كريم تفتيح 😊 

عندك خيارات واسعة للتقشير حسب المواد الفعالة :

1/الأحماض
امثلة لبعض الأسماء التجارية : كريم سكينورين skinoren و أزادرم الاتنين نفس المادة الفعالة و هي حمض الازاليك ، كريم سبوتليس من ايفا.
2/الريتينويدات
و هي مشتقات فيتامين أ(زي الادابالين، تريتينوين)
طبعا اسماء الكريمات كتيرة باختلاف الشركات، لكن بديكم امثلة للأكثر تداول(ماربلين، اكرتين، اكنيلين، شور كيور)
3/الريتينول
الريتينول(فيتامين أ نفسه)
مستحضرات الريتينول سعرها اغلى و مفعولها ابطأ

*اغلب المقشرات دي في منها جِل(للبشرة الدهنية) و كريم(للبشرة الجافة)، لكن في حال عَدم توفر النوع المطابق لنوع بشرتك ممكن تستخدمي التاني لكن بِحذر، يعني ناس البشرة الدهنية ممكن يستخدمو الكريم اذا ما بيتضايقو من تركيبته الدهنية، و اللي بشرتهم جافة كمان مافي مانع يستخدمو الجل لكن يهتمو اكتر بالترطيب..

ثانياً :

تعرفي الطريقة الصحيحة للاستخدام
في حاجة خليها ف بالك انه المقشرات تحتاج تمرين للبشرة، زي التمارين الرياضية في الاول بتتعب العضلات، نفس الشي المقشرات في الاول ممكن تهيّج البشرة ف ما تخافي ابدي بالتدريج مثلا نص ساعة ف اليوم لحدي م تصلي ساعتين و تاني ممكن تنومي بيها عادي..
الكميّة و الوقت المناسب للاستعمال و عدد المرات اللي حتستخدمي فيها العلاج حتفرق معاك جداً، سواء اخترتي اي نوع من المقشرات السابق ذكرها حاولي انه الكمية ما تتجاوز (حبة البازلاء) يعني حاجة بسيطة جداً، الاستعمال يكون بالليل بس و 3 مرات في الاسبوع كأقصى حد لحدي ما تتعودي عليها ممكن تعمليها كل يوم عادي، الكريمات دي اي رهيبة و كلمة رهيبة شوية عليها لكن عايزة تعامل بِذكاء عشان تتجنبي آثارها الجانبية من احمرار و حكة وقشرة شكلها ممكن يكون مزعج..

(الكمية المناسبة من المقشر) 👇🏻

*ملاحظات مهمة :

*اذا كنتي حامل ابعدي كُل البعد عن العلاجات دي خاصة الريتينويدات  ، لأنه ثبت انها مُرتبطة بتشوُّه الأجنّة.. 

أَما اذا كنتي بتخططي لِحمل لازم توقفيها قبل شهرين ع الأقل لأنه بتكون في تراكيز منها باقية في جسمك (العروسات المحبوسين خليكم واعين) ممكن الواحدة يكون عرسها قريب و بتستعمل المقشرات دي و توقفها قبل ايام و عادي يحصل حمل في شهر العسل.. الحَذر واجب في الموضوع ده لأن صحة طفلك لا تُضاهى بأي شي تاني❤️
مقشرات الأحماض زي سكينورين(بحمض الازاليك)  تعتبر آمنة بعد الشهر التالت، لكن من وجهة نظري مابعتبر شي كيميائي انه آمن خلال الحمل لأن المسائل دي مُعقدة جداً و مرتبطة بتراكيز و كلام كتير، انتي ما عارفة بيحصل شنو جوة جسمك و شنو التفاعلات والآثار اللي ممكن تحصل ف عشان كده خليك ف السيف سايد، و بعدين فترة الحمل دي فيها لخبطة هُرمونات و من الطبيعي تجيك حبوب و اسمرار فالمشكلة اصلا قائمة مافي داعي تتعبي نفسك ف الفاضي..
بالنسبة للمرضع عادي تستعمل مقشرات لكن بعد ال6 شهور..

*فترة التقشير بتكون بشرتك حساسة و فيها جفاف(حتى لو كانت في الاصل دهنية) ، اتجنبي السنفرات و الفيشل والحاجات دي، كمان ما تغسلي وشك كل شوية ع الفاضي والمليان عشان ما تزيديها جفاف،هم تلات مرات غسيل ف اليوم كفاية جداً و ياريت نبعد عن الصابون خاصة اصحاب البشرة الجافة.. 

*الشمس عَدوك اللّدود في فترة التقشير، بتشكّل خطر كبير و ممكن تعمل ليك حروق، استخدمي واقي الشمس اذا مُتضطرة تطلعي، و على حظكم الحلو ده انسب وقت عشان تبدو في العلاج، استغلو فترة الحظر و عالجو بشرتكم 😂

*الاستعمال طبعا يكون على بشرة نظيفة و تاخدي الكمية الصغنونة اللي اتفقنا عليها قبيل و تمسحيها على كامل وشك(مش بس الحبوب او الاثار نفسها)، لأنه قد تكون في حبوب تحت الجلد انتي ما شايفاها، غير انه المقشرات دي عموماً مفيدة لبشرتك..
ضروري ضروري جداً ما تتعرضي لأي إضاءة وقت الاستعمال (حتى اضاءة الغرفة العادية) لأنها بتقلل من فعالية كريم التقشير..يعني امسحي وشك و طفي النور و ما تسلطي اي ضوء عليك حتى شاشة الجوال..